په غور ولایت کې هم د خوړو او درملو ملي ادارې د آمریت پرانستنه وشوه
په غور ولایت کې هم د خوړو او درملو ملي ادارې د آمریت پرانستنه وشوه؛
1445/07/26 هـ ق
د افغانستان د خوړو او درملو ملي ادارې، د رهبرۍ په پراخو هلو ځلو او ولایاتو ته د خپلو څانګو د غزولو په لړ کې پرون سه شنبه د روان 1445هـ ق کال د رجب د میاشتې په 25 نیټه په غور ولایت کې هم د خوړو او درملو ملي ادارې آمریت د یاد ولایت د اړوند ادارو د استازو په شتون کې پرانیستل شو او ښاغلي داکتر صفي الله صارم په یاد ولایت کې د خوړو او درملو ملي ادارې د آمر په توګه وټاکل شو.
ددغې آمریت په پرانیست غونډه ښاغلي صارم د ادارې دندو، مسؤولیتونو، حیاتي او اقتصادي ارزښت په اړه هر اړ خیز معلومات شریک کړل او زیاته کړه هڅه کوي ترڅو په یاد ولایت کې خلکو ته باکیفیته او خوندي درمل او خوراکي توکي وړاندې کړي.
په ورته وخت د غور ولایت ځايي چارواکي باکیفیته خواړه او درمل د انسان د ژوند لپاره مهم توکي وبلل او په یاد ولایت کې د خوړو او درملو ملي ادارې د آمریت له پرانیستلو څخه خوښي څرګنده کړه.
